Mendeak eta urteak pasa dira. Legeak eta agintariak aldatuz doaz... eta euskarak gure ahoetan darrai, eta bere zoria gure esku. Horregatik, IKA Euskaltegiak eta Mendabiako Euskara Taldeak antolatzen ditugun kultur asteekin, antzerki, hitzaldi, kontzertu, herri kirol nahiz bazkari baten bitartez, edonola ere, euskara kaleratzen saiatzen gara. Hizkuntzari lotzen zaizkion konplexu guztiak uxatu eta geure-geurea den hizkuntzatzat har dezagun, hizkuntza bizia baita, interes politiko guztien gainetik dagoena, geurea baita, denona alegia. Beraz, hemendik animatu nahi zaituztegu “lingua navarrorum” ikastera, eta praktikara eramatera bizitzako edozein esparrutan. Anima zaitez, eta parte hartu antolatu diren ekitaldietan.
